تانىمال ساتيريك تۇرسىنبەك قاباتوۆتى «Nur Otan» پارتياسىنىڭ قۇرامىنا كىرگەنى جانە «ءبىز بىرگەمىز» اتتى چەللەندج اكسيانى باستاعانى ءۇشىن سىناپ، ۆيدەوۇندەۋ جولداعان الماتىلىق بەلسەندى ايدار ورازبەكتىڭ ءوزى سىننىڭ استىندا قالدى. بلوگەردىڭ پىكىرىنشە، قاباتوۆتىڭ پارتيا قاتارىنا كىرۋى – ۇلكەن قاتەلىك بولىپ سانالادى-مىس.

اتالعان ۆيدەوروليك جاقىندا قازاقستاندىق ينتەرنەت كەڭىستىگىنە تارالعان بولاتىن. ال، «Jas Otan» جاستار قاناتىنىڭ ءتوراعاسى ەلنۇر بەيسەنباي ايدار ورازبەكتى دە، ونىڭ ءسوزىن سويلەگەن وزگە بلوگەرلەردى دە «ارزان حايپقا» باردى دەپ ايىپتادى.

– اتىڭ شىقپاسا جەر ورتە» دەمەكشى، بۇل ءىستى بارىپ تۇرعان ارزان حايپ دەگەننەن باسقا شارا جوق. جۇيەسىز، دالەلسىز سىن ايتۋدان گورى، جاقسى ىسكە باستاماشى بولعان دۇرىس دەپ ەسەپتەيمىن. ءوزىن «الماتىنىڭ بەلسەندىسى» دەپ تانىستىرعان جىگىتكە ايتارىم: وزگەرىستى ءار ادام وزىنەن باستاۋ كەرەك. تۇرسىنبەك پارتياعا كەلسە، ءجونسىز سىناعاننان، ءوزىم ارالاسامىن، قيسىعى بولسا تۇزەيمىن، وزگەرىستەردى كوپپەن بىرگە جاسايمىن دەگەنى. قازاقستاندا ماسەلە شەشەتىن جالعىز پارتيا بولسا، ول – نۇر وتان. مەن دە سولاي ويلاعاندىقتان، پارتيا قاتارىنان تابىلدىم، – دەدى ول.

تانىمال جۋرناليست قۇرمانبەك جۇماعالي دا بلوگەردىڭ ارەكەتىن «اتىڭ شىقپاسا، جەر ورتەنىڭ» كەيپى دەيدى.

– قازاقتىڭ ءبىر اتالى ءسوزى ەسىمە ءتۇسىپ وتىر، ەلدىڭ قامىن ويلايتىن ءبىر ۇل تۋسا، ونى قاباتىن ەكى يت قوسا تۋادى. قوعامدا بار، وتباسىندا بار ماسەلەنى استارلى ازىلمەن جەتكىزىپ قانا قويماي، جاستاردى جۇمىلدىرۋ جولىندا ەڭبەك ەتىپ جۇرگەن تۇرسىنبەكتىڭ كۇردەلى ماسەلەلەردى ناتيجەلى شەشىلۋىنە سەپتىگىن تيگىزەتىن «نۇر وتان» پارتياسىنىڭ مۇشەسى بولۋى دۇرىس شەشىم دەپ ەسەپتەيمىن، – دەپ جازدى ق.جۇماعالي ءوزىنىڭ Facebook-پاراقشاسىندا.

ول ايدار ورازبەكتىڭ قاباتوۆتى قارالاعانى العا باسپايتىن ءىس دەپ ءبىلدى.

– الەۋمەتتىك جەلىدە پاراقشام بار ەكەن دەپ، ەل ءۇشىن، مەملەكەت ءۇشىن ەڭبەك ەتىپ جۇرگەن ازاماتتاردى قارالايتىنداردىڭ بولعانى وكىنىشتى، – دەپ جازدى تانىمال جۋرناليست.

جەلى قولدانۋشىلارىنىڭ كوبىسى ايدار ورازبەكتىڭ بۇل ىسىنە رەنىشتەرىن ءبىلدىردى.

– جۇمىس ىستەۋگە قاراعاندا، سىناۋ ءارقاشان وڭايىراق. شەشىمىن ىزدەۋدەن گورى، كىنا تاعۋ جەڭىلىرەك. ورتاق ماقسات ءۇشىن بىرىگۋدىڭ ورنىنا قالىس قالعان جەڭىل!»، «الدىمەن اۋىلدىڭ توسكەيىندە اۋناپ، الىسقا ماقسات قويعان، ءار جاعدايعا وزەگى وزەۋرەگەن تۇرىسىنبەكتەي ەڭبەكقور بولىپ السىن دەيسىڭ...»، «مۇنداي دا ءسوز بولىپ پا؟»، «قازاقتا بىرلىك ۇعىمى قۇردىمعا كەتىپ بارا جاتىر-اۋ! باۋىرىنىڭ ەتىن جەگەنى نەسى سونشا؟»، «كاندەك شاۋىلدەيدى، كەرۋەن جولىن جۇرە بەرەدى!»، «تۇرسىنبەك اعا، وندايعا كوڭىل اۋدارماي-اق قويىڭىز!»، «كىم قاي پارتياعا كىرەدى، كىممەن دوس بولادى، قايدا بارادى، ءوز ەركى ەمەس پە؟!، – دەپ جازۋدا جەلىدەگىلەر.

ەسكە سالايىق، وتكەن اپتا ەلوردادا رەكوردتىق دەڭگەيدە قار جاۋعاننان كەيىن، ساتيريك تۇرسىنبەك قاباتوۆ قولىنا كۇرەك الىپ، قار كۇرەپ، «ءبىز بىرگەمىز» اتتى چەللەندج باستاعان بولاتىن. ونىڭ اكسياسىن ونەر جۇلدىزدارى مەن ساياساتكەرلەر جانە وزگە دە تانىمال تۇلعالار جالعاپ، قالانى قاردان تازارتۋعا اتسالىسقان.